محتاجه رأيكم

السلام عليكم ورحمه الله وبركاته

انا كتبت هنا مشكلتى لانى فعلا حسيت قد ايه كل اللى هنا ماشاء الله بيحبوا بعض فى الله وقد ايه قلبهم على بعض
ولانى مخنوقه وربنا عالم وقولت يمكن الاقى حد يفدنى ويريحنى
انا مخطوبه من شهر فبراير اللى فات دا
وخطيبى من القاهره مش من نفس المدينه اللى انا منها وهو ظروفه على قده وهو عرفنى بالبدايه بظروفه وانا قبلته على كدا
المشكله فى والدتى بتهتم اوى بموضوع المواسم والهدايا والكلام دا ودايما تحرق دمى وتعايرنى ان خطيبى ظروفه على قده وتقولى شوفى فلانه خطيبها ايه شوفى وقعتها حلوه ازاى مش خيبتك وياعينى عليكى يابنتى وعلى وقعتك السودا
غير انها عاوزاه كل ما يجيلى يجيبلى هديه بمناسبه وبدون مناسبه خصوصا انه بيجيلى كل 3 اسابيع او مره كل شهر
اخر مره كان عندى لاحظت انها كل شويه تبوصله نظره وحشه كأنه مش طيقاه
وبعد مامشى قعدت تزعقلى انه ازاى يجى من غير هديه وقالتلى عرفيه ان ماما علقت على كدا وانك لازم تجيب هديه وتقدرنى طول ما انا فى بيت اهلى
رغم ان والدى كلمها كتير فى المووضع دا وقالها حرام وبلاش كدا الناس هتفركنا ماديينوبردو ى تستغل بابا مش موجود وتقعد تكلمنى فى نفس الموضوع وتقول كلام يحرق دمى
انا بجد تعبت ونفسيتى تعبت ومش عارفه اعمل ايه لدرجه اخدتها معايا دروس المسجد اللى بحضر فيه وقولت للأستاذه انها تتكلم عن موضوع المواسم وان بلاش نخنق الخطيب بالهدايا والكلام دا بردو ولا اهتمت
وكل ما اقولها غلط ومش يصح كدا تقولى انتى لو عليكى عاوزه تروحيله ببلاش
على فكره انا كنت مخطوبه قبل كدا 3 مرات ومحصلش نصيب لان بعد الخطوبه مكنتش برتاح معاهم وبفك الخطوبه
ماما دايما تقعد تقارن بين ظروف خطيبى دا واللى قبليه وتقولى شوفى ولا بيجيب ولا بيعمل واللى فبله كان مقدرك ومكنش عاجبك وبردو سبتيه انا مش عارفه ايه اللى عاجبك فيه